Акафист, сиречь неседальное, иже во святых отцу нашему блаженному Луке, епископу Белгородскому.

Кондаки и икосы на блаженнаго святителя Луку подобны Великому Акафисту Пресвятей Богородице, творение смиреннаго Кир Илария, архиепископа Макаровскаго (+2018).

Кондак 1.

Избранный слуго Божий и изрядный святителю Христов, блаженне отче Луко! Людем белгородским и всем притекающим к тебе скорый молитвенниче и заступниче, сподоби нас, память твою чтущих, недостойными усты и сердцы смиренными воспети тебе сия похвальная словеса. Ты же, предстоя у престола Христа Бога нашего от всяких нас бед и напастей свободи, зовущих ти:

Радуйся, святителю Луко, изрядный ко Христу о нас молитвенниче.

 

Икос 1.

нгелом подражателя и человеком божественна наставника зрим тя, святителю отче Луко: от младых лет бо возлюбил еси богонадежное слово и добродетельному житию поревновал еси. Сего ради, молитвами твоими утверждаеми, сице тебе вопием:

Радуйся, родителю твоею благокрасное прозябение: радуйся, зерно небеснаго сеяния.

Радуся, от рождения твоего Богом предъизбранный: радуйся, в рождении твоем благословенный.

Радуйся, родителю твоею отрада и веселие: радуйся, целомудрию украшение.

Радуйся, измлада ум верою просветивый: радуйся, отроческим послушанием горнюю мудрость обретый.

Радуйся, издетства тепло Бога возлюбивый: радуйся, от юности безмолвие и истинную простоту, яко пищу и питие, приявый.

Радуйся, граду Бел

городскому обрадование: радуйся, всея Руси християнския утешение.

Радуйся, святителю Луко, изрядный ко Христу о нас молитвенниче.

 

Кондак 2.

Видяй Благопромысленник Господь тя от юности всеми добродетельми благоукрашенна, направи сердце твое ко взысканию единаго на потребу. Ты же, сего возжаждав, навыкл еси непрестанно взывати к Богу: Аллилуиа.

 

Икос 2.

Разум Божественный имый, вся суетная привременнаго жития сего отвергл еси, отче Луко: темже вся яже на земли красная оставив, приял еси образ ангельский, доброю жертвою всесожжения быти Христу Богу желая. О сем же  духовне веселящися, и мы приглашаем ти:

Радуйся, делателю заповедей Господних всеизряднейший: радуйся, поборниче Истины нелицеприемнейший.

Радуйся, бесы яко мертвотрупогладательные псы прогнавый: радуйся, к Горним яко на крилах возлетевый.

Радуйся, добре безмолвствовати присно изволивый: радуйся, лукавых человек бездверная уста молитвою твоею заградивый.

Радуйся, зельным пощением, яко благовкусною пищею, всегда питавыйся: радуйся, всенощным бдением и непрестанным молением себе в подвизе укрепивый.

Радуйся, доблественный Духа воине: радуйся, светосиятельный крепости нашея столпе.

Радуйся, Единаго Христа от сердца возлюбивый: радуйся, Тому Единому всею душею служити вожделевый.

Радуйся, святителю Луко, изрядный ко Христу о нас молитвенниче.

 

Кондак 3.

Силою свыше, от великия Печерския Лавры Пречистыя Богородицы поставлен бысть во епископи Белграду, Божественным Духом сугубую благодать приял еси, и сию сущую в тебе возгреваяй, научаеши всех непрестанно Богу пети: Аллилуиа.

 

Икос 3.

Имеяй ум и сердце Духом Святым просвещенная, саном епископским почтен быв, его же достойно восприял еси, отче Луко, благоревностно подвизался о спасении Богом врученнаго тебе словеснаго стада. Сего ради вопием ти сице:

Радуйся, мужески иго Христово на ся возложивый: радуйся, грехоозябший мир проповедию Евангельскою согревый.

Радуйся, верным всем ненасыщаемая очима сладость: радуйся, людем християнским всерадостное веселие.

Радуйся, люботоржественный веры православныя проповедниче: радуйся, спасению паствы твоея многотщательный попечителю.

Радуйся, мудродруголюбными советы притекающих к тебе наставивый: радуйся, обиновение всякаго лица отринувый.

Радуйся, убогим и вдовицам милостивый покровителю: радуйся, предивный сиротскаго устовождения сирокормителю.

Радуйся, духовно воочити люди твоя потщавыйся: радуйся, православных собори от злака Божественных Таинств чудне воспитавый.

Радуйся, святителю Луко, изрядный ко Христу о нас молитвенниче.

 

Кондак 4.

Бурю мятежеогненных помысл, от бесов непрестанно воздвизаемую, до конца Крестом угасил еси и утешался о таковем одолении победы, умильно Богу воспевал еси: Аллилуиа.

 

Икос 4.

Слышавше и видевше людие белгородстии тебе благодатию святительскою почтенна бывша от Бога, но смиренную мудрость стяжавша паче многих человек, благодаряху о тебе Спаса Вседержителя. Сего ради и мы взываем ти, благоимените святителю Луко, сице:

Радуйся, евангельския проповеди труба в народе громогласная: радуйся, благовестия Христова гусли доброзвяцающии.

Радуйся, непрестанными молитвами, и воздержанием и видением душу свою к божественному желанию вперивый: радуйся, боговиднейшее изображение в души добродетелей виды написавый.

Радуйся, яко веры православием кипя, прелесть поганскую суемудрия угасил еси: радуйся, яко рачением благим ревнуя, зловерство нечестивых человек на благоверие преложил еси.

Радуйся, ум свой, якоже злато, еже искушается от огня, благодатию Христовою очистивый: радуйся, душу свою, яко сребро разжжено, искушено земли, очищено седмерицею доблемудро устроивый.

Радуйся, всем благочестивым прибежище: радуйся, иноком твердое наставление и благонадежное ограждение.

Радуйся, вере благочестивей правило: радуйся, благий винограда Христова делателю.

Радуйся, святителю Луко, изрядный ко Христу о нас молитвенниче.

 

Кондак 5.

Боготечная светила, путь живота твоего озаряющая быста тебе угодника Божия преподобная Антоний и Феодосий, двоица благокрасная, к нима же присно с молитвою прибегал еси, поя Богу: Аллилуиа.

 

Икос 5.

Видел еси, всечестне отче Луко, твоима очима угодники Божии Антония и Феодосия и всю богособранную дружину печерскую, предстоящия пред лицем Господа и к Нему молящияся помиловати люди християнския и сподобити сих Царствия Небеснаго. О сем тепле воздыхающи, похвальная воспеваем ти:

Радуйся, высокомысленным отцем поревновавый: радуйся, богоносных наставников стопам последовавый.

Радуйся, великим Антонию и Феодосию воздержным житием и нравом уподобивыйся: радуйся, мирскую красоту и желания века сего отринувый.

Радуйся, надежею вечных благ укреплявыйся: радуйся, источник беззаконию и плотския похоти умертвивый.

Радуйся, отцем печерским благоискусный наследник бывый: радуйся, их учению и трудам добре подражавый.

Радуйся, бесовских козней и мятежа благоразумно избежавый: радуйся, миродержца князя века сего и козней его победник явивыйся.

Радуйся, от преподобных отец художеству молитвы и брани духовней добре навыкнувый: радуйся, дверь сердца своего, яко верный страж, побдевый.

Радуйся, святителю Луко, изрядный ко Христу о нас молитвенниче.

 

Кондак 6.

Проповедник истинныя благочестия веры и апостолом соревнитель, был еси треблаженне святителю Луко, тихостию и разумом смиренномудрия с кротостию учению Христову духовную паству свою научая, звал еси всех пети Господу Богу: Аллилуиа.

 

Икос 6.

Возсиял еси славному Белграду чистотою жития твоего и светлостию многотрудных твоих подвиг, всемудре святителю отче Луко: в немже велие тщание о созидании храмов имел еси, еже умножити хваление во славу Христа Бога нашего и Пречистыя Его Матере, к высочайшему уму взыти всеусердно прилежал еси, во святая святых тщашеся, темже и соучастником освящения Великия Церкве Печерския сподобился еси быти. Сего ради воспеваем ти сице:

Радуйся, православныя веры и благочестия ревнителем словом и житием своим явивыйся: радуйся, пастырю добрый, стадо свое на пажитех духовных упасый.

Радуйся, светом Христова учения и ревностию твоею о славе Божией всех озаривый: радуйся, гражданы белгородския гражданы Небеснаго Иерусалима Христа соделати моливый.

Радуйся, соосвящением Великия Печерския Церкви Пречистей Госпоже Богородице сыновне послуживый: радуйся, от грознаго воеводы чинов ангельских, соосвящением в егоже имя храма красна князем Всеволодом созданнаго, монастыря Выдубецкаго, введение в дом Божий небесный приявый.

Радуйся, вседушне красоту дома Господня возлюбивый: радуйся, о спасении многих всегда ревновавый.

Радуйся, благочиния церковнаго преблаженный блюстителю: радуйся, ангелоподобнаго пения и чтения Божественнаго искусный учителю.

Радуйся, яко благолепием Церковь Христову, богомудре, украсил еси: радуйся, яко сего ради и Христос по кончине твоей храм души твоея преукрашен сотворил есть.

Радуйся, святителю Луко, изрядный ко Христу о нас молитвенниче.

 

 

Кондак 7.

Хотяй невозбранно в Небесная Селения умно восходити, многословесие мятежнаго мира сего отринув, безмолвие чувственных и мысленных уст возлюбив, с небесными чины беседовал еси, воспевая с ними купно хвалебную песнь: Аллилуиа.

 

Икос 7.

Новую тя показа тварь Творец всяческих, изрядне угодниче Христов Луко, безплотным чином сомолитвенника и плотски на земли поживша. Темже чудящеся воспеваем ти:

Радуйся, ангеле земный, близ скорбящих вскоре обретавыйся: радуйся, человече небесный, посещением немощных всех удививый.

Радуйся, яко огнем молитвы Иисусовы сердце свое разжегл еси: радуйся, яко свеща во тме неверия пламенеющая явился еси.

Радуйся, людем православным путь ко Христу показавый: радуйся, покаяния изрядный проповедник явивыйся.

Радуйся, вместо драчия греха кипарис благочестия взрастивый: радуйся, вместо кропивы буемыслия мирсину благаго упования в душе насадивый.

Радуйся, светом жития своего дряхлость греха разрушивый: радуйся, душа людий своих яко птица избавлятися от сети ловящих научивый.

Радуйся, яко дуси злобы поднебесныя молитвою крепкою отгнал еси: радуйся, яко действом благодати одеян свыше неистовство бесовских мучителей разорил еси.

Радуйся, святителю Луко, изрядный ко Христу о нас молитвенниче.

 

Кондак 8.

Странна и чужда миру сему суемудренну и лукаву видел еси себе, досточудне отче Луко. Посему Горнему миру причащаяйся выну, на недвижемем камени веры исповедания Христова утвердился еси, предстоя Богу с песнию: Аллилуиа.

 

Икос 8.

Весь ум свой Божественною свыше просветив благодатию, дивный во архиереех отче Луко, ко Христу всем сердцем прилепился еси, и паству свою на земли не забыл еси, к той всегда взывая сладце: внидем в самый рай Божественнаго Писания, соберем, яко крины благоуханныя, приличныя времени нашего спасения изречения! Сего ради, богомудрию твоему дивящеся, похвалы сия тебе приносим:

Радуйся, в догматех православныя веры добре утвердивыйся: радуйся, семена благочестиваго исповедания в сердцах человек кротко насеявый.

Радуйся, люди паствы твоея огласивый красно: радуйся, тьму неверствия светом словес Христовых разсеявый дерзновенно.

Радуйся, тайноводственная нашея веры аки некое сокровище всем на утверждение предавый: радуйся, человецем поучаемым умными устами своими зинувшим и разверзшим я, благодати Божия и разума Святаго Писания сладость вкушения подавый.

Радуйся, заблудшим вождю: радуйся, погибшим обретателю.

Радуйся, прельщенным наставниче: радуйся, ослепленным умом руководителю.

Радуйся, оскверненным чистителю: радуйся, расточенным взыскателю.

Радуйся, святителю Луко, изрядный ко Христу о нас молитвенниче.

 

Кондак 9.

Все существо ангельское удивися крепкоподвижному твоему житию, на земли бо пожив яко человек Божий и по отшествии твоем внити сподобился еси в радость Господа своего, всяк возраст и всяко сословие со ангелов лики подвигл еси песнословити великаго Бога хвалебною песнию: Аллилуиа.

 

Икос 9.

Ветия многовещанныя не возмогут восхвалити преславных деяний твоих множество и сердца твоего любы глубину, блаженне святителю отче Луко, мы же на святолепный образ твой вапы дел благих твоих живописанный взираем, сокровенныя мощи твоя разумеюще, и смиренно убо поминающе сицевая исправления твоя, умиленную песнь приносим ти, глаголюще:

Радуйся, слезами покаяния душу свою убеливый: радуйся, любовь к Богу и ближнему своему выну имети завещавый.

Радуйся, реками учений своих жаждущия напоивый: радуйся, вся душеполезная благая алчущим подавый.

Радуйся, всем притекающим к тебе различна исцеления сотворивый: радуйся, вся телесныя немощи и душевныя болезни страждущим уврачевавый.

Радуйся, вся приносимая моления у Престола Христова утоливый: радуйся, многа чудеса всем упованием призывающим тя сотворивый.

Радуйся, угодное чудес Божиих орудие: радуйся, деснице чудотворения Иисусова.

Радуйся, духом в Небесных селениих обитаяй, а телом на земли опочиваяй: радуйся, каменю драгий, всю землю Русскую украшаяй.

Радуйся, святителю Луко, изрядный ко Христу о нас молитвенниче.

 

Кондак 10.

Спасти хотя вверенныя ти люди, Евангельскаго закона благодать по вся дни проповедал еси, в сердцах человеческих Христа распята к покаянию воображая, да борения бесовская и греховныя помыслы испразднятся, к деянию богомыслие приложити научая, темже и стяжал еси сугубый венец от Великаго Архиерея Христа, Ему же предстоиши ныне, радостно вопия: Аллилуиа.

 

Икос 10.

Стена еси Церкве Христовы от заповедей Господних Духом Святым утвержденная верным людем явился еси, всеблаженне святителю Луко! Носил бо еси закон Господень обетований Христовых посреде чрева Твоего, темже обильно добродетельми плодоносил еси. Сего ради, ублажающе тя, вопием ти:

Радуйся, Единаго в Троице Бога познавый: радуйся, страстем идолы поправый.

Радуйся, Приснодевство Пресвятыя Богородицы всегда прославлявый: радуйся, блудныя помыслы всегда обуздавый.

Радуйся, вся святыя верою почтивый: радуйся, вся злохудожная от души своея отторгнувый.

Радуйся, все житие твое Богу посвятивый: радуйся, праздности и унынию места не давый.

Радуйся, заповеди Христовы яже о любви верно исполнивый: радуйся, сердце свое от ненависти и злобы очистивый.

Радуйся, благонравие и подвиги святых отец восприемый: радуйся, тиранство бесовское истребивый.

Радуйся, святителю Луко, изрядный ко Христу о нас молитвенниче.

 

Кондак 11.

Пение непрестанное Пресвятей Троице всегда вознося, святе Луко, и умом и словом и делом, уязвенно сердце твое любовию к Триипостасному Богу имел еси, егоже вожделе душа твоя, присно хвалебное сие твориши глашение: Аллилуиа.

 

Икос 11.

Светоподательный светильник явился еси в земнем житии твоем, богоблаженне отче, и по успении твоем возсиял еси яко светило светозарное Русския земли: утешаеши бо верных токи чудес твоих, и всякий с верою и любовию к тебе притекаяй исцелений богатство износит. Мы же, благодарения исполненнии, зовем ти:

Радуйся, ветие превысшаго Богословия: радуйся, уста громогласная Божества Христова.

Радуйся, веры Христовы добропеснивая ластовица: радуйся, Евангелия доброгласная свирель.

Радуйся, якоже мудрая пчела, паче меда и сота, в беседах душеполезных слухи послушающих усладивый: радуйся, якоже искусный строитель к богоразумию Божественных Писаний всех привлачивый.

Радуйся, печальным утешителю: радуйся, обидимым помощниче.

Радуйся, алчущим кормителю: радуйся, требующим подателю.

Радуйся, несмысленным наказателю: радуйся, поганым спасителю.

Радуйся, святителю Луко, изрядный ко Христу о нас молитвенниче.

 

Кондак 12.

Благодать Христову дати восхотел еси граду Твоему, яко заповедь и завещание людем земли нашея оставил еси образ по Бозе изящнаго твоего жития, на него же взирающе и Христу покланяющеся, усердно вси поем Богу: Аллилуиа.

 

Икос 12.

Поюще равноапостольныя труды твоя и чудеса и цельбы, зрим тя яко град свыше утвержден и яко храм чуден благодатию Духа Свята исполнен и облагоухан, восхваляем Господа Бога, даровавшаго нам таковаго богопроповедника и архиерея преподательна божественных светов, наставника и за ны молитвенника. Приими убо от нас, святый епископе Луко, похвалы сицевыя:

Радуйся, в Слове Божии и писаниих отеческих истину обретый: радуйся, от источник мудрости и спасения бисеры драги собравый.

Радуйся, водою живою от источник Божественных Писаний страстей пламы угасивый: радуйся, мзду многу на Небесех стяжавый.

Радуйся, лампадо Божественнаго сияния: радуйся, сосуде Божия благодати.

Радуйся, истинныя философии любителю: радуйся, целомудрия делателю.

Радуйся, молитвенниче теплый: радуйся, ходатаю верный.

Радуйся, правде творителю: радуйся, бесом проклинателю.

Радуйся, святителю Луко, изрядный ко Христу о нас молитвенниче.

 

Кондак 13.

О всеблаженный святителю отче Луко, епископе Белгородский, приими сие наше малое и худое хвалебное пение, тебе приносимое, и якоже словеса драгоценномудроплетенны вмени, и умоли Владыку Христа избавитися нам всякия напасти и печали и вечнаго живота достигнути, да с тобою воспеваем: Аллилуиа.

 

Сей кондак глаголи трижды. И паки чтутся икос 1: Ангелом подражателя: и кондак 1: Избранный слуго Божий.

 

Молитва, иже во святых отцу нашему Святителю Луце, епископу Белгородскому

О всеблаженне богопроповедниче и святителю, отче наш Луко, архиереев украшение, Русския Церкве утверждение, Белгороду заступление и пастырю наш добрый! Припадаем ти, о светильниче Церкве Христовы, и умиленно просим тя, иерарше всехвальный, настави нас на путь благий, во еже не ходити нам путем заблуждающих.

Молися, святителю добрый, ко Всемилостивому Владыце нашему Иисусу Христу спастися паствы Его людем, благостояние святых церквей утверди: архиереи благолепием святительства украси, помяни и архиереи, иже тебе на престоле Белгородстем последствующия, иночествующия к подвигом добраго течения укрепи, землю Русскую и вся грады и веси наша добре сохрани, православную веру нашу святу и непорочну соблюсти умоли, мир весь теплым предстательством твоим умири, от глада и пагубы и от нашествия иноплеменник избави ны, безумныя умудри, старыя утеши, юныя настави, вдовицы помилуй, сироты заступи и напитай, младенцы возрасти, плененныя возврати, немощствующия и молящияся тебе от всех напастей и бед ходатайством твоим свободи, вся ны, чтущия память твою честно, всездравственны сотвори.

Моли о нас, чадех твоих и сродницех, Всещедраго и Человеколюбиваго Христа Бога нашего, да подаст нам росу благодати Своея и токи слез, яко да омыем множество грехов наших, сводящих нас в преисподнюю, и да очищеннии явимся пред Страшным Престолом Его, и радости сподобимся, еюже радуешися ныне, славословя державу Его со всеми святыми во веки веков. Аминь.

  • с. Білогородка, вул. Володимирська, 73/1
  • Настоятель храму протоієрей Вячеслав Лазорик
  • тел. +38(097)-68-23-569
  • xram.com.ua@gmail.com
  • від ст. м "Академмістечко" маршрут №796 "Київ-Боярка"
  • від ст. м "Нивки" маршрут №748 "Київ-Білогородка", №749 "Київ-Бобриця"
  • від ст. м "Виставковий центр" маршрут №374 "Київ-Білогородка"